حكايات الناس… ونصيحتي للبنات

بقلم/ نهاد مهيا

بيتك وحياتك وأسرارك و غرفة نومك اعتبريهم حَرم مش أي حد يدخل بيتك ومش أي صاحبة هتبقى أخت

بيتك له حدود ممنوع لأي شخص يتجاوز حدودك

أسرارك جواكي ولو احتاجتي نصيحة أو دعم يبقى صديقة ثقة

والأم أفضل صديقة

غرفة نومك ممنوع دخولها دي خصوصية حياتك مملكتك الخاصه لا أمك ولا حماتك ولا أختك ولا صاحبتك ومش من حق حد يزعل ولو زعل يبقى مع السلامه

احمي بيتك وحياتك

واسمعي النصيحة

زوجك واجب عليكي احترامه وواجب عليه تقديرك واحترامك

الإحترام بينكم مش رفاهية دا أمر واجب الكلمة الطيبة بتعيش والذكريات الجميلة بينكم هتكبر

اهتمي بنفسك عشان تحبي صورتك في المراية

والزعل طبيعي والخطأ منكم وارد يحصل لكن باب التسامح دايمًا مفتوح

تتعلمي.. امتى تتكلمي وامتى تسكتي

امتى تزعلي وتغضبي وامتى تعدي

بيتك مملكتك وأنتي ملكة فيه وزوجك ملك كوني تاج على رأسه يفتخر بيكي

واعرفي مقدار حبه ليكي وحبك ليه

وأوعي في يوم تقارني بينه وبين حب أبوكي ليكي أو أخوكي أو بين حبه لأمه وأخته وبين حبه ليكي

كل حب وليه طبيعته وليه مكانه

أنتي سندك ابوكي وأمانك في حضن اخوكي

وهو حمايتك اللي النبي وصاه عليكي

وأمه دي الجنه تحت أقدامها وأخته قرة عينه وصديقته

وأنتي من ضلعه هيتقي الله فيكي

شوفي يا بنتي

بيتك الجديد ازرعي فيه حب و أمان وسعادة واحتواء وحنان

تحصدي منه من الخير أشكال وألوان