البنت اللي لسه بتتعلم وبتجري وتضحك وتلعب بالعرايس ، الطفلة الصغيرة اللي عمرها 14ـ 15 سنه أو أقل فجأة تلبس فستان وفرح وناس ونقولها مبروك بقيتي عروسة وهي في الحقيقة ضحية .
وتدخل بيت غريب وعالم غريب عن فطرتها وتتحمل مسؤولية نفسية وجسدية أكبر منها البنت الصغيرة تتجوز قبل ما يكمل نموها الجسدي والعقلي والنفسي.
أهلها للأسف بيجوزوها بدري بسبب الخوف من الفقر والعادات والتقاليد في بعض القرى والجهل وفي الاخير ( بيع حلال ) لبناتنا
ده اسمه بيع مش ستر وخصوصاً لو جواز بغرض الفقر والرجل أكبر منها ب سنين في سن والدها تقريبا أو أكبر
والرد الجاهز أصل العريس غني ومش هيتكرر وفرصة
هسألك سؤال؟؟ مش هيتكرر وفرصة لمين !!ليك ولا ليها ؟؟
نتائج زواج القاصرات
البنت الصغيرة اللي كل طموحها لعب بعروسه وجري مع بنات في سنها
بتتعرض لاضطرابات نفسية و عنف زواجي وجسدي
يعني بتخسر طفولتها بتدخل عالم كله مسؤوليات أكبر منها بتخسر صحتها في حمل وإنجاب
بتخسر نفسيتها مواقف فوق تحملها وفوق طاقتها
بتخسر مستقبلها حرمانها من التعليم
والكارثه الجوازات دي بتنتهي بسرعة
بطلاق طفلة بتربي طفلة
القانون بيقولك دي جريمة تتحاسب عليها
الإنسانية بتقولك دا كسر طفولة بريئة
الدين بيقولك دا ظلم
الدين عمره ما أجبر بنت على الجواز فما بالك لو طفلة
قال” النبي صلى اللّه عليه وسلم” لا تنكح الأيم حتى تستأمر ولا تنكح البكر حتى تستأذن
يعني لازم رضاها واختيارها بعقل ونضج
رسالتي لكل أم و أب
الفقر مش عيب عشان تبيع بنتك بلاش تظلمها خليها تعيش طفولتها و برائتها
