لمة العيلة كل جمعة

بما أن النهاردة الجمعه وكل جمعه وأحنا طيبين

وبما أنه يوم معظمنا بياخده اجازة

فين بقى ؟

فين لمه العيلة بتاعت كل يوم جمعه

فين شباب العيلة اللي بيتجمع عشان يروح يصلي الجمعه

ويرجع يلاقي الغدا جاهز والناس كلها موجودة

يمكن حالي وحال ناس كتير

إن كل واحد فينا في مكان بعيد عن التاني لكن ده ميمنعش مكالمة التليفون اللي كانت بتحصل كل يوم جمعه الصبح

ونسأل على بعض ونهتم بأمور بعض ونشوف أحوال المريض والمسافر واللي عنده ظرف واللي عنده فرح

حتى مكالمة التليفون مبقتش موجودة

الزيارة مبقتش موجودة

في الأفراح بنكتفي بفرد واحد يروح يبارك بالنيابة عن الجميع

حتى في الحزن نفس الطريقة

ويقولك كفاية واحد يعمل الواجب وخلاص

عادات كتير بدأنا ننسحب منها من غير ما نشعر

كل عاداتنا وتقاليدنا القديمة اتمحت مع الوقت

كان يوم الجمعه ده بالنسبة للناس يوم عيد كله بيستناه من الأسبوع للأسبوع

بيستنى اللمه الحلوة حتى الاكله الحلوة كانت يوم الجمعه

الزيارات حتى للأصدقاء والجيران كانت يوم الجمعه

لكن دلوقتي بقينا بنكتفي برساله على الواتساب

كل حاجه زمان كانت احلى

المشاعر والألفة والمحبه

السؤال بقى تقضيه واجب

بجد حرام على كل واحد فينا بيفتقد قيمه مهمه ليه و لأولاده وحياته

حرام على كل واحد فينا

نسى أن فيه ناس مسؤوله منه

أمه أبوه خاله عمه أخواته

حرام على مشاعر ماتت وفي ايدينا نحييها من تاني

كل واحد يبدأ بنفسه ويقوم يسأل و يطمن ولو قادر يروح يزور

ونفتكر إن يوم الجمعة ده كان عيد لكل المسلمين

عيد كل أسبوع

عارف يعني ايه عيد كل أسبوع