ألبوم الذكريات

بقلم.. نهاد مهيا

في يوم كنت قاعدة مع نفسي وقت الغروب سرحت بخيالي افتكرت ذكرياتي في بيت العيلة واللمة الحلوة واللعب والضحك اللي من القلب ومدرستي و أصحابي.

ويمكن دي كانت أول مرة أحس بحنين وحب وفرحة كانت جوا قلبي

حبيت أعمل وقت لنفسي ويكون اسمه ألبوم الذكريات

افتكر كل اللحظات الجميلة والحضن الحنين افتكر لبس العيد ومصروفه ولبس أول يوم مدرسة وأكل أول يوم رمضان وكل العيلة موجودة مع بعضها بحب وسلام

افتكرت ذكرياتي واتمنيت لو الزمن يرجع تاني واعيش كل لحظة بحب أكتر ما كنت وقتها

لما برجع مع ألبوم ذكرياتي والشوق والحنين لكل كلمة وكل موقف يتثبتلي إن العيب مش في الزمن ولا الوقت العيب فينا أحنا

الزمن مجرد وقت وأيام التغيير كان جوانا مع تغيير عاداتنا وتقاليدنا وقيمنا تغيير في السلوك والتربية وحتى تغيير في المشاعر

اتغيرنا في كل شيء ولما نتكلم نقول الزمن اتغير والدنيا اتقل خيرها والناس بقت وحشة

طب ياتري مين السبب أكيد أنا وأنت وأنتي

ويمكن لما اتغيرنا للأسوا الأرض غضبت وكل حاجه عليها فعلا اتغيرت الوقت بيجري

المناخ اتغير كل حاجه كانت ماشية عكس اتجاهها

ياريت كل واحد فينا يفتح ألبوم ذكرياته ويشوف لو يقدر يرجع أي قيمة كانت موجودة يبقى فاز

كل واحد فينا لو رجع قيمة واحدة فعلا وقتها الناس هتتغير والزمن هيرجع تاني حتى لو بعض أحبابنا مش موجودين هنعمل ذكريات مع ولادنا و اخواتنا و أصحابنا

احنا هنا ولسه موجودين

أنا هنا والآن وأنت كمان هنا والآن