رسالة حب لنفسي

بقلم/نهاد مهيا

أنا بحب نفسي وبحب كل حاجه فيا بحب ضعفي وقوتي وسكوتي وكلامي وضحكي

أنا بحب نفسي اللي ربنا خلقها لأنها دي أنجح صورة أنا فيها

الصورة اللي اتولدت بيها وعليها من غير كدب ولا خداع

و فخورة بنفسي فخورة بكل لحظه وقفت فيها لوحدي وأنا بتهز من جوايا من الخوف والتعب

فخورة أن لسه جوايا نور رغم كل حاجه حواليا كانت ضلمة

أنا عارفه قد إيه الأيام والمواقف كانت تقيلة وصعبه ومش بتعدي بسهولة

وقد إيه كنت بحبس دموعي غصب عني وابتسم واضحك وواقفة ثابتة مكاني

كنت بظهر أن أنا شجاعة وقوية بس في الحقيقة كنت خايفة لكن كان بيظهر فيا قوة مكنتش أعرف أنها جوايا

عارفه ومقدرة أن كل لحظة ضعف مش دليل على فشلي يمكن تكون دليل إني محتاجه أرتاح عشان أعرف أكون أقوى أعرف أكمل مشواري .

التعب مش عيب فيا دا طبيعي والهدوء مش ضعف دا اتزان

كام مرة نمت وأنا موجوعه، كام مرة كنت محتاجة أحكي واتكلم وكنت لوحدي، أنا يمكن أكون متلخبطة ومش فاهمه أنا رايحه فين لكن الأكيد أن أنا موجودة

أوقات ببعد و أقفل على نفسي و أوقات ببعد حتي عن نفسي بهرب بالعزلة والنوم أو بهرب بالسكوت أو حتى الدوشة

بس في وسط كل دة أنا لسه جوايا حب و طيبة جوايا طفلة بريئة و إنسانة حنونه

أنا أستحق أحب واتحب و أتكلم من غير ما أبرر ولا أشرح ولا أتفهم غلط

أنا من النهاردة مش هسمح لأي ألم يهزمني ولا هسمح لأي حزن يكسرني أو يوجع قلبي

أنا لنفسي مصدر قوة وأمان، مصدر لفرحتي وسعادتي وكياني وكبريائي، أنا ناجحه وقوية أنا إنسانة بحاول اتعلم و أنجح و استمر

وهفضل أقول لنفسي أنتي كده زي ماانتي

مش لازم أكون أحسن من غيري ولا لازم أكون دايما قوية أو شجاعة يكفي أن في عين نفسي أفضل نسخه أنا فيها

أنا استاهل أسمع الف كلمه حب والف رسالة تقدير وشكر

أنا سند نفسي وكل خطوة هي مشوار لكفاحي وطموحي

كل دمعه نزلت مني كانت بتغسل وجع وبتشفي جرح وبتمسح ذكريات مؤلمة

أنا هسمعني واسندني وأحبني و ارحميني واحميني واحتويني

زي ما كنت بتمنى حد يقف جمبي و معايا ف أنا الأمان لنفسي و لغيري وقررت أكون حقيقية اختارت أقول لاء لما قلبي يقول لاء مش هغصب مشاعري ولا قلبي ولا هكدب عقلي

وأخيراً هقول لنفسي

كل حاجه هتعدي

أنا قوية

أنا استاهل

أنا النور والحب والسلام